Bangkay sang babaye, nasapwan sa abandonado nga salakyan sa Sta. Barbara, Iloilo
ILOILO — Yara na sa advanced state of decomposition ang bangkay sang babaye nga nasapwan sa sulod sang abandonado nga salakyan sa Barangay Inangayan, Sta. Barbara kahapon, Oktubre 26.
Ginkilala sang iya utod ang biktima kay Claire Diergos, 36-anyos nga naga-istar sa Deca Homes, Pavia pero tumandok sang Dagsaan, Buenavista, Guimaras.
Sang ginbuksan ang Montero Sports, naputos si Diergos sang habol kag natabunan sang comforter. Ginplastar ang iya bangkay sa passenger seat sa likod sang driver seat.
Ginpahayag PMAJ Raymond Celoso, hepe sang Sta. Barbara Police Station, nga may pilas sang pagkabuno sa liog si Claire.
May tatlo ka pilas sa liog ang biktima kag may pilas man sa kamot nga ginapatihan defense wound niya.
Ginapanan-aw suno kay Celoso nga ginpatay sa iban nga lugar ang biktima kag ginbilin lang sa nasambit nga barangay.
Wala sang nasugid nga problema ukon kaaway si Claire suno sa iya iloy nga si Mrs. Helen Diergos, sang nag-video call sila sang Oktubre 24 sang gab-i. Nakita ni Mrs. Diergos nga yara lang sa iya balay sa Deca homes si Claire sang nagtawganay sila.
Pagkasunod nga adlaw, nag-chat pa si Mrs. Diergos kay Claire kun makitaay sila pero indi na ini online.
Ginkumpirmar sang iloy nga nga si Claire man ang nagapanag-iya sang habol kag comforter nga gintabon sa bangkay gani nagapati ang pamilya nga sa iya balay lang ginpatay ang biktima. — via Aksyon Dave Bucayan