SK kagawad sang Tabuc Suba, Jaro, nagbuyagyag nga ginkuha sila bilang job hire sang Iloilo City hall agud mag-manage sang FB page nga naga-promote sa Uswag Iloilo Party-list kag kay Mayor Jerry Treñas

ILOILO CITY – Ginbuyagyag ni Tabuc Suba, Jaro SK Kagawad Lerry Jude Tipanan nga ginikuha sila bilang job hire sang Iloilo City Hall agud mangin manager sang Facebook page nga naga-promote sa Uswag Ilonggo Party list, kay Mayor Jerry Treñas, kag sa iya bata nga si Miguel nga aspirant man sa pagka-konsehal sang siyudad.

Suno kay Tipanan, ginhambalan siya ni Tabuc Suba, Jaro Punong Barangay Joel Jabonillo nga siya ang ipadala nga representative sang ila barangay sa meeting parte sa social media, sa Barangay San Isidro, Jaro. Sang Setyembre 11 suno sa iya ginhiwat ang meeting.

Pag-abot sa venue, gin-train sila kun paano maghimo sang Facebook page. Ginpahayag ni Tipanan nga wala siya sang ideya kun para sa ano ang page.

Pagkatapos sang orientation suno kay Tipanan, may nagpatunga nga executive assistant kag naghambal nga “welcome to Iloilo City Government.”

Gintumod niya nga executive assistant si Kap. Goygoy Acap. Natingala siya kun ano ang buot silingon ni Acap pero nagsiling pa gid siya nga, “sa wala pa nakahibalo, job hire na kamo sang City Hall.”

Gin-ako man ni Tipanan nga wlaa gid siya nakahibalo nga kuhaon sila agud mangin job hire.

Ginpaathagan sila nga tag-P500 ang ila mangin sweldo kada adlaw kag maga-umpisa ang ila trabaho sa Oktubre 1.

Ginhambalan sila kun ano ang mangin pangalan sang ila nga Facebook page, ano ang mangin profile picture kag cover photo, kag kun ano ang ila nga ipang-post.

Ginbuyagyag niya man nga may group chat sila kun diin ginapaagi ang mga instructions parte sa ila ipang-post sa ila ginhimo nga mga Facebook page.

Ginatinguhaan pa sang Aksyon Radyo Iloilo nga makuhaan sang pahayag si Kap Goygoy Acap.