Gobyerno sang Korea, handa nga magbulig para sa construction sang Panay-Guimaras-Negros Bridge — DPWH
ILOILO CITY – Nakahanda ang gobyerno sang Republic of Korea nga maghatag sang financial support para sa engineering services sang ginakalangkagan nga inter-island bridges project sang Department of Public Works and Highways (DPWH) sa Western Visayas.
Suno kay DPWH Acting Secretary Roger G. Mercado, matapos nga nakumpleto ang supplemental feasibility studies sang mga Koreans, suguran ang detailed engineering design (DED) sang Panay-Guimaras-Negros (PGN) Bridge Project.
Kun matabo, ini ang pinakamalaba nga taytay sa Rehiyon 6 sa diin mangin mahapos ang byahe sang mga tawo sa Iloilo pa-Guimaras, kag pa- Bacolod City kag makabulig sa turismo, kag iban nga essential travels.
Ang minutes of discussion para sa financial support sa engineering services lakip ang preliminary kag detailed engineering design kag procurement assistance nga kinahanglan antes ang construction sang taytay, ang ginpirmahan subong nga adlaw nanday DPWH Undersecretary for Unified Management Office Operations (UPMO) Emil K. Sadain kag Country Director Jae-jeong Moon halin sa Manila Representative Office of the Korea Export-Import (KEXIM) Bank.
Ang signing ceremony, gintambungan man nanday Deputy Director Soohhyung Han kag Ana Labella sang KEXIM Bank, kag Project Director Benjamin A. Bautista sang DPWH UPMO Roads Management Cluster 1.
Ginpahayag naman ni Sadain nga ang Koreans, nagkomiter sang official development assistance (ODA) loan sa Pilipinas paagi sa KEXIM Bank – Economic Development Cooperation Fund (EDCF) agud gastuhan ang DED sang flagship bridge project. Iga-formalize ang loan paagi sa signing ceremony sa Disyembre 2021.