IATF, ginatun-an ang posibilidad nga lubos nga dulaon ang face shield policy bangud sang naganubo nga COVID-19 cases – Pres’l Spokesperson Harry Roque

Ginadiskusyunan pa sang Inter Agency Task Force kun bala padayunon sang publiko ang mandatory nga paggamit sang face shields sa pila ka lugar.

Suno kay presidential spokesperson harry roque, pila ka miembro sang IATF ang pabor sa pagdula sa requirement para sa face shields bangud sang naganubo nga kaso sang COVID-19 apang wala pa ini sang desisyon.

“Dahil bumababa ang numero marami nang, kung baga, nagsasabi sa IATF na baka dapat itigil na rin ang pagsusuot ng face shield pero wala pa pong desisyon ah. Magsusuot pa rin po tayo ng face shield,” ang pahayag ni Roque sa press briefing kahapon, Nobyembre 2.

Una na gin-require sang gobyerno ang pagsuksok sang face shields sa mga pampubliko nga lugar.

Apang sang Setyembre, ginpahayag ni Presidente Rodrigo Duterte nga indi na required ang face shields sa mga open spaces kag i-require lang sa 3Cs ukon sa closed spaces, crowded places, and close-contact settings.

Gin-athag ni Roque nga wala pa sang pinal nga desisyon ang task force sa lubos nga pagdula sang face shield policy, apang ginatun-an na ini sang technical working group. — with reports from ABS-CBN, Manila Bulletin