Alert Level System, ipatuman na sa bug-os nga pungsod
MANILA – Gin-aprubahan na ni Presidente Rodrigo Duterte ang nationwide implementation sang COVID-19 alert level system. Ini base sa Executive Order No. 151 nga ginpaguwa sang Malacañang kahapon, Nobyembre 11.
Nagapadayon ang una nga phase sang programa sa Metro Manila, Central Luzon, Calabarzon, Western Visayas, Central Visayas, Northern Mindanao, kag Davao Region.
Suno pa sa EO nga ang Ilocos Region, Eastern Visayas, kag Soccsksargen, maga-adoptar sang alert level system antes matapos ang Nobyembre para sa ikaduha nga phase.
Ang masunod nga phases ang ipatuman sa kada semana tubtob malab-ut ang full implementation sa Disyembre.
Malakip sa third phase ang Cagayan Valley, Bicol Region, kag Zamboanga Peninsula, samtang sa ika-apat nga phase malakip naman ang Cordillera Administrative Region, Mimaropa, Caraga, kag Bangsamoro Autonomous Region in Muslim Mindanao (BARMM).
Una nga ginpatuman ang alert level system sa Metro Manila sang Setyembre nga ginbulos sa community quarantine restrictions.Ang Iloilo City napaidalum sa Alert Level 3, samtang yara naman sa Alert Level 2 ang Iloilo province.
