Special Investigation Team sang IPPO, nag-conduct sang mock trial sa Claire Diergos Case

ILOILO — Nag-conduct sang mock trial ang Special Investigation Team (SIT) sang Iloilo Police Provincial Office (IPPO) may kaangtanan sa kaso nga pagpatay kay Claire Diergos, ang nasapwan sa abandonado nga salakyan sa Inangayan, Sta Barbara sang Oktbre 26.

Gin-imbitar sa mock trial ang mga prosecutors, miembro sang pamilya Diergos kag mga imbestigador.

Katuyuan sang mock trial nga mahibaluan kun ano ka kabug-at sang kaso pananglitan i-file na ini sa korte.

Ginpresentar sang mga imbestigador sa trial ang mga natipon nga ebidensya apang pag-abot sa prosecutor, kulang pa ang mga ebidensya gani kinahanglan nga dugangan agud mas mabaskog ang kaso nga i-file batok sa mga suspetsado.

Una na ginpahayag ni SIT designated spokesperson Police Senior Master Sergeant Francisco Lindero nga ginapreparar na nila ang mga kaso batok sa mga suspects sa pagpatay kay Claire apang nagbalibad na siya magsugid kun ano nga mga kaso ang iga-file kag kun pila ang mga suspetsado sa krimen. — via Aksyon Angel Mae Ciudad