Kapitan sa Inangayan, Sta Barbara, ginhatagan sang Special Investigation Team sang 24-oras nga magpaathag sa ‘partly deleted’ nga CCTV footage

ILOILO – Nagapangayo sang paathag ang Special Investigation Team sa Claire Diergos Case sa ginpahayag nga na-delete nga parte sang footage nga na-capture sang CCTV camera sa Brgy. Inangayan, Sta. Barbara sa diin ginbilin ang salakyan sang biktima.

Base sa Facebook post sa IPPO Facebook page, ginsulatan ni PMAJ Raymond Celoso, hepe sang Sta. Barbara MPS, si Punong Barangay Ricardo Bayog sang Brgy. Inangayan agud pangayuan sang paathag kun ngaa ‘nadula’ ang pila ka bahin sang footage sa na-capture sang Oktubre 26 tubtob 27, 2021.

Oktubre 26 sang hapon sang natukiban ang bangkay ni Diergos sa sulod sang iya salakyan, naputos sang comforter kag carpet ang iya nga lawas.

“Ginasaligan sang SIT nga may dako nga maibulig ang CCTV footages agud kumpirmahon ang iban nga mga impormasyon kabahin sa pagpatay kay Claire Diergos,” ang kabahin sang post sa IPPO FB page.

Ginhatagan si Punong Barangay Bayog sang 24 oras agud maghatag sang paathag.

Napirmahan sang Nobyembre 11, 2021 ang sulat para kay Punong Barangay Bayog, kag kahapon man sang hapon niya man ini nabaton. — via IPPO