Iloilo City, Iloilo province, ipaidalum sa COVID-19 Alert Level 2 halin Nobyembre 15 tubtob 30
MANILA – Gin-aprubahan sang Inter-Agency Task Force ang alert levels nga ipatuman sa nagkalain-lain nga lugar sa pungsod tubtob sa katapusan sang Nobyembre.
Ipaidalum sa Alert Level 4 sugod sa Nobyembre 17 tubtob Nobyembre 30 ang Catanduanes. Ang Baguio City sa Cordillera Administrative Region kag Siquijor sa Region VII ang ipaidalum sa Alert Level 3 sugod Nobyembre 15 tubtob sa katapusan sang bulan.
Ipahamtang man sa Alert Level 3 ang Batanes, Quirino kag Nueva Vizcaya sa Region II Isabela City kag Zamboanga City sa Region IX halin sa Nobyembre 17 tubtob 30.
Samtang epektibo gilayon ang Alert Level 2 tubtob sa Nobyembre 30 sa Ilocos Sur, La Union, Pangasinan, Dagupan kag Ilocos Norte sa Region I; Tacloban, Southern Leyte, Samar (Western Samar), Ormoc City, Eastern Samar, Northern Samar, Leyte kag Biliran sa Region VIII; South Cotabato, Sarangani, General Santos City, Sultan Kudarat, kag Cotabato (North Cotabato) sa Region XII.
Alert Level 2 man nga maepekto sa Nobyembre 15 tubtob 30 ang National Capital Region; Nueva Ecija, Bataan, Aurora, Pampanga, Bulacan, Tarlac, Zambales, Olongapo kag Angeles City sa Region III; Rizal, Cavite, Laguna, Batangas, Quezon kag Lucena City in Region IV-A; Bacolod City, Iloilo City, Negros Occidental, Capiz, Antique, Aklan, Iloilo Province kag Guimaras sa Region VI; Negros Oriental, Lapu-Lapu City, Cebu City, Mandaue City, Cebu Province kag Bohol sa Region VII; Cagayan de Oro City, Misamis Occidental, Lanao del Norte, Bukidnon, Camiguin, Misamis Oriental kag Iligan City sa Region X; kag Davao del Norte, Davao de Oro, Davao Occidental, Davao City, Davao del Sur kag Davao Oriental sa Region XI.
Ipaidalum sa Alert Level 2 sugod sa Nobyembre 17 tubtob 30 ang Santiago City, Cagayan kag Isabela sa Region II; Albay, Sorsogon, Naga City, Camarines Sur, Camarines Norte kag Masbate sa Region V; Zamboanga del Norte, Zamboanga Sibugay kag Zamboanga del Sur sa Region IX.
Ang Alert Level 1 nagatumod sa mga lugar nga manubo kag nagapanubo ang COVID-19 case transmission, manubo man ang total bed utilization rate kag intensive care utilization rate.
Ang Alert Level 2, nagatumod sa mga areas nga manubo kag nagapanubo man ang case transmission, ukon ang case counts nagapanubo pero ang total bed utilization rate kag intensive care utilization rate nagapataas.
Ang Alert Level 3, amo naman ang mga areas nga mataas ang case counts kag nagapataas man ang total bed utilization rate kag ICU utilization rate.
Ang Alert Level 4, nagatumod sa mga areas nga mataas ang case counts kag may yara sang high total bed utilization kag ICU utilization rates.
Ang Alert Level 5 amo naman ang mga areas sa diin makabig nga alarming ang case counts kag critical na ang total bed utilization kag ICU utilization rates.