December 4, 2021

VIRAL | Grade 12 student sang Estancia NHS, nagdul-ong sang module sa eskwelahan matapos nag-obra sa talamnan dala ang ginamaneho nga traktura

Read Time:1 Minute, 31 Second

ILOILO – Handum gid sang Grade 12 student sang Estancia National High School nga makatapos sang iya pagtuon sa pihak sang kapigaduhon agud makabulig sa iya pamilya. Ini ang rason ni Erwin Gonzales sang Barangay Bayuyan, Estancia, nga ginabalanse gid ang oras sa pagsabat sa iya module kag pagpanguma.

Sang damlag lang, gin-post sang iya maestra nga si Ms. Annie Araneta nga nagpadulong sa eskwelahan agud magdul-ong sang module si Gonzales sakay sa iya ginamaneho nga traktura.

Suno kay Gonzales, ginhapit niya na lang sa eskwelahan ang module halin sa iya gin-obrahan. Kun gab-i siya, suno sa iya nagasabat sang module samtang kun adlaw naman nagatrabaho sa talamnan.

Nagapangamo ang pamilya ni Gonzales. Gin-ako ni Gonzales nga nabudlayan man siya sa iya sitwasyon pero ginapang-uyatan niya ang laygay sang iya amay nga magpadayon lang sa pag-eskwela.

Subang si Gonzales sa apat ka mag-ulutod kag tatlo ka tuig na nga nagabulig sa pagpanguma sa iya amay.

Gindugang pa niya nga nagahimakas gid siya agud malab-ot ang handum nga mangin pulis.

‘MATUTOM NGA BATA’

Isa ka maayo nga ehemplo sang bata nga nagatinguha gid para sa iya pagtuon sa pihak sang kapigaduhon. Ini ang paglaragway ni Ms. Araneta kay Gonzales.

Sa pagkamatuod suno sa iya, wala gid ginalaktawan ni Gonzales ang pagpasa sang module.

Suno kay Araneta, “very touching” ang ginhimo sang iya estudyante nga sa pihak sang kasakuon, nakasumiter gihapon sang module kumparar sa iban nga estudyante nga matawhay ang pangabuhi pero indi makapasa.

‘NAKAAGI SA PAG-UNTAT SA PAG-ESKWELA’

Ginkumpirmar man ni Araneta nga nakaagi disgrasya sa motorsiklo si Gonzales gani nag-untat sa pag-eskwela sang isa ka tuig.

Pero makita gid suno sa iya nga dedikado si Gonzales sa iya pagtuon bangud nagbalik gid siya sa pag-eskwela. — via Public View

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post 4 ka menor-de-edad, nadakpan nga tuyo mag-siphon sang gasolina sa naga-park nga motorsiklo sa Jaro
Next post Balay, nasunog sa Tabuc Suba, Jaro