Truck driver nga nagapasaka sa ginamaneho nga salakyan, patay sang nabungguan sang motorsiklo sa San Dionisio

ILOILO — Patay si Edmon Labaro, 33-anyos sang Brgy. Cubay, San Dionisio sang nabungguan sang motorsiklo sa national highway nga sakop sang nasambit nga barangay, las 8:30 kagab-i, Nobyembre 22.

Suno kay Police Lieutenant Jose Nelios Sabron, hepe sang San Dionisio Police Station, nagtabok ang biktima pakadto sa gin-park niya nga truck kag hana na siya nga magsaka sang nabungguan sang motorsiklo nga ginamaneho ni Julius Marcelo, 40-anyos sang Brgy. Hacienda Conchita, San Dionisio.

Nahulog si Labaro kag nakalampos ang ulo sa karsada, samtang natumba naman ang driver sang motorsiklo.

Gindala sa Sara District Hospital sanday Labaro kag Marcelo. Gindeklarar nga dead-on-arrival ang truck driver samtang nakaagum sang minor injuries ang driver sang motorsiklo kag out patient sa ospital.

Ginpreso sa San Dionisio Police Station ang driver sang motorsiklo nga nagpabutyag nga luyag i-settle ang insidente suno kay Lt. Sabron. — via Aksyon Kikik Enar