SIT, may resource person na nga makabulig tudlo sa mga suspetsado sa pagpatay kay Claire Diergos
ILOILO — May resource person na ang Special Investigation Team nga makabulig tudlo sa mga suspetsado sa pagpatay kay Claire Diergos.
Si Diergos ang nasapwan sa gin-abandonar nga salakyan sa Barangay Inangayan, Sta. Barbara sang Oktubre 26. Isa na ka bulan subong nga adlaw sang nakit-an ang bangkay ni Diergos.
Suno kay Police Senior Master Sergeant Francisco Lindero Jr, spokesperson sang S.I.T, ang resource person nila ang makabulig para matumod ang mga suspetasado nga ginatudlo sang ebidensya kapareho sang dash cam kag CCTV camera nga ila nakuha.
Dugang pa ni Lindero nga may identity na sila sang pila ka mga individual nga posible may kahilabtanan sa kamatayon ni Diergos.
Gin-athag man ni Lindero nga wala pa sila sang eyewitness pero pinaagi sa mga ginhatag nga statement sang mga resource persons kag sa mga resulta sang technical test, amat-amat nga nagaklaro ang ila imbestigasyon.
Ginahulat na lang sang SIT ang abiso sang ila mga legal officer kun san-o puwede ma-file ang kaso sa masobra tatlo ka mga indibidwal.
Una na ginpahayag ni Lindero nga duha na lang ka anggulo ang ila ginasundan sa pagpatay sa biktima.
Ginkalipay naman sang pamilya ni Diergos ang mga update sa kaso. — via Aksyon Angel Mae Ciudad