ACTIVITY | 3-day National Vaccination Drive sa Nobyembre 29-Disyembre 1
ILOILO – Ginahaylo sang Iloilo City kag Iloilo Provincial Government ang mga wala pa makapabakuna batok sa COVID-19 nga mag-upod sa 3 Days National Vaccination Drive sa siyudad kag probinsiya sang Iloilo sa Nobyembre 29 tubtob Disyembre 1.
Sa Iloilo City, buksan ang vaccination sites sa Robinsons Jaro, SM City Iloilo, kag Ateneo de Iloilo, suno kay Mayor Jerry Treñas.
Indi na kinahanglan nga magpapre-register ang indibidwal nga luyag magpabakuna kadungan sang three-day vaccination drive.
Samtang sa probinsiya, magpadulong lang sa Rural Health Unit (RHU) sang banwa agud makapabakuna batok sa COVID-19. “Ang bakuna safe, ang bakuna kinahanglan,” suno kay Governor Arthur Defensor Jr.
Base sa Proclamation No. 1253 nga ginpirmahan ni Presidente Rodrigo Duterte, ang mga empleyado halin sa public kag private sectors, iga-excuse sa ila trabaho kun mag-upod sa vaccination drive.
Handum sang Pilipinas nga makabakuna batok sa COVID-19 sang kapin 70 percent sang total population sang pungsod lakip na ang mga naga-edad 12 tubtob 17-anyos.
Sa tatlo ka adlaw nga bakunahay, 15 million Filipinos sa bug-os nga pungsod ang bakunahan sa diin kapin 338,716 naman ang target sa probinsiya sang Iloilo.
Magapadayon naman ang vaccination sa mga menor-de-edad kag booster shot samtang ginahimo ang mass vaccination drive.
