POLICE REPORT | 21-anyos nga babaye, nagpadulong sa La Paz Police Station kag nagreklamo nga ginhimuslan siya sang pulis

ILOILO CITY — Nagreklamo ang 21-anyos nga babaye nga ginhimuslan siya sang pulis kagab-i.Suno kay PMAJ Jose Val Ladublan, hepe sang La Paz Police Station, las-10 kagab-i sang nag-report sa ila ang babaye.

Sa panaysayon sang tagreklamo, suno kay Major Ladublan, mga las-seis sang gab-i sang nagsulod siya sa lodging house upod sa pulis nga iya ginareklamo.

Base sa pagpangusisa sang La Paz police, madugay na nga kilalahay ang 21-anyos kag ang pulis nga ginareklamo niya.

Ginpahayag ni Ladublan nga sang nagpadulong sa ila ang babaye kagab-i, luyag lang niya ipa-blotter ang natabu kag ‘daw undecided’ nga mag-file sang kaso.

Sa subong, indi ma-contact ang cellphone number sang tagreklamo, suno kay Ladublan.

Gina-contact nila ang tagreklamo para kuntani nga asikasuhon ang i-file nga kaso kag pagpaidalum sa babaye sa medical examination. — via Aksyon Angel Mae Ciudad