Mga barangay officials sang Iloilo City, magasto sang tag-P19,800 para sa 3-day convention sa Iloilo Convention Center; Accommodation sa Marriott Hotel, nalakip sa pondo
ILOILO CITY — Magasto sang P19, 800 ang kada barangay official sang Iloilo City para sa tatlo ka adlaw nga Convention angut sa petition sang National Liga nga i-extend ang barangay elections kag paghingyo nga ihatag na lang sa mga barangay ang mga benefits imbes nga kuhaon pa sang national government.
Suno kay Liga ng mga Barangay President Irene Ong, sa Disyembre 6 tubtob 8 ang schedule sang ila Convention sa Iloilo Convention Center.
Masobra 100 ang mga partisipante nga lakipan sang mga barangay kapitan, SK, kag mga barangay kagawad, depende sa kun sin-o ang delegate sang mga barangay nga may mga pondo.
Ginpahayag ni Ong nga may hotel accommodation sila sa Marriott Hotel sa sulod sang duha ka gab-i kag tatlo ka adlaw. Sa isa ka kwarto sang Marriott ang maka-accommodate lang sang duha ka indibidwal.
Ang ila pamahaw, panyaga, kag panyapon ang iserbe sa Iloilo Convention Center.
Dugang pa ni Ong, inisyatibo ini sang National Liga kag ang iban nga mga probinsya pareho sang Antique, kag Capiz ang nakatapos na sang ila Convention. — via Aksyon Jeremae Ventar
