1 patay, 1 pilason sang nakabunggo ang motorsiklo sa SUV sa Badiangan

ILOILO — Patay si Engr. Arman Soresca, 41-anyos sang Zone 1 Brgy. South Fundidor, Molo samtang pilason ang backrider nga si Denmark Gramo, 29-anyos sang Brgy. Tamoan, Janiuay sang nakabunggo ang ila ginasakyan nga motorsiklo sa Montero Sports nga ginamaneho ni Boycee Cortuna, 57-anyos sang Brgy. Iniligan, Badiangan.

Suno kay Police Lt. Ma Dahlia Tabares sang Badiangan Police Station, natabu ang aksidente las 5:30 sang hapon sa Brgy. Linayuan, Badiangan, nagasakay sa motorsiklo ang mga biktima pakadto sa Janiuay kag sugata nila ang SUV pakadto naman sa Passi city sang na-aksidente.

Naga isi-isi ang motorsiklo sang nakita sang driver sang SUV rason nga nagpondo siya pero nabungguan gihapon sang motorsiklo.

Wala sang pilas si Soresca pero nagsuka siya sang dugo kag napatay pag-abot sa ospital.

Bukol naman sa ulo ang naagum ni Gramo. Gin-custody sang Badiangan police ang driver sang SUV.