Concepcion, Iloilo Mayor Raul Banias, naga-apelar nga ang mga bakunado lang vs COVID-19 ang makakadto sa pampubliko nga mga lugar
CONCEPCION, Iloilo – Nagahimo sang konsultasyon si Mayor Raul Banias sa nagkalain-lain nga government agencies may kaangtanan sa plano nga mga fully vaccinated lang batuk sa COVID-19 ang pahanugutan nga magkadto sa pampubliko nga mga lugar.
Gin-athag ni Mayor Banias nga sa subong, naga-apelar pa lang siya sa mga unvaccinated nga magpabakuna na.
Ginpabutyag sang alkalde nga nahangpan niya nga may diretso ang mga nagapamalibad nga magpabakuna, “pero bilang isa ka doktor, nabal-an ko man ang poder sang isa ka mayor sa aton General Welfare Clause sang Local Government Code nga nagapahayag dira nga, ‘in the interest of public health and safety,’ pwede kita maka-obra sang mga tikang nga ma-maintain naton ang safety sang aton banwa.”
Pwede suno kay Mayor Banias nga makahimo ang LGU sang direktiba, executive order ukon ordinansa, “to preserve public safety and public health.”
“Ang aton nga himuon sini, katulad sa Singapore, sa America, kun wala ka ma-vaccinate kag kun indi ka gid magpa-vaccinate, ang himuon mo magpa-RT PCR [testing] ka every two weeks kag kun negative ka, amo lang na nga makaguwa ka para maproteksyonan man ang imo kaugalingon ang mga tawo nga imo ma-meet,” ang dugang ni Mayor Banias. – via Aksyon Hotline