Pavia SB Member Pyt Trimañez, madihon sang resolution agud ipanawagan sa SIT sang IPPO nga padasigon ang imbestigasyon sa pagpatay kay Claire Diergos
ILOILO — Katuyuan ni Pavia SB Member Pyt Trimañez nga mahibaluan kun ano pa ang mga legislative moves nga pwede nila mahimo rason nga magadihon siya sang resolution agud magpanawagan sa Special Investigation team nga padasigon ang imbestigasyon sa kaso sang pagpatay kay Claire Diergos.
Ginpahayag ni Trimañez nga kun ma-apprubahan sa ila regular session sa Lunes ang iduso niya nga resolution siya mismo ang mahatag sini sa Iloilo Police Provincial Office upod kay SB Member Dan Fajardo agud nga makapangusisa sila sang update sa kaso.
Isa pa gid sa ila mga rason ang pagpang-alang-alang sang pila ka mga resource persons nga magpirma sang ila affidavit nga nangin rason kun ngaa wala gilayon ma-file ang kaso batok sa mga suspetsado.
Ginhimo ni Trimañez ang ini nga tikang bangud sa balay ni Diergos sa Balabag, Pavia una nga natabo ang krimen antes ginbilin sa Sta. Barbara ang iya nga bangkay.
Nagpanawagan man siya sa mga may ihibalo sa krimen nga magpakig-angut sa mga otoridad agud mapadasig ang paghatag sang hustisya kay Diergos.
Si Diergos ang babaye nga nasapwan sa sulod sang iya gin-abandonar nga salakyan sa Brgy. Inangayan, Sta. Barbara sang Oktubre 26.