‘No COVID-19 vaccine booster, no entry” policy, ipatuman sa Iloilo City Hall
ILOILO CITY – Ipatuman sang Iloilo City government ang “No booster shot vs COVID-19, No entry” nga polisa sa Enero 2022.
Kasunod ini sang ginpaguwa nga Office Order No. 2021-065 ni City Administrator Melchor Tan nga na-address sa mga department heads kag heads of offices.
Sugod Enero 17, 2022, indi pagpasugtan nga makasulod sa City Hall ang mga empleyado nga fully vaccinated sang Setyembre kun wala pa sila makapa-booster shot.
Ginmanduan ang mga department heads nga abisuhan ang mga empleyado nga magpatublok sang booster dose antes ang nasambit nga petsa.
Pareho man nga pagsulundan ang ipatuman sa mga may transaksyon sa City Hall, base pa sa office order.
Suno naman kay Iloilo City COVID-19 team Spokesperson Jeck Conlu, puwede nga makapa-booster shot ang mga empleyado sang City Hall sa Iloilo Freedom Grandstand ukon mga vaccination sites sang syudad. May tiun pa suno sa iya ang mga empleyado nga makapatublok bangud sa Enero 17 pa man ma-epekto ang mandu. – via Firingline