October 7, 2022

Una nga kaso sang Omicron variant sang COVID-19 sa Western Visayas, na-detect sa OFW nga nagpadulong sa Bacolod City

Read Time:1 Minute, 45 Second

BACOLOD CITY — Nagpositibo sa Omicron variant sang COVID-19 ang Overseas Filipino Worker (OFW) nga nagpadulong sa Bacolod City.

Ini ang ginkumpirmar ni Dr. Chris Sorongon, deputy for medical sang Bacolod City Emergency Operation Center (EOC) sa interview sang Aksyon Radyo Bacolod. Pero gin-athag ni Sorongon nga fully recovered na sa COVID-19 ang kaso.

Fully vaccinated na batok sa COVID-19 ang OFW kag natublokan naman sang booster dose. Halin sa Miami Florida, USA sa diin naga-trabaho sa cruise ship ang OFW kag nag-abot sa Manila sang Disyembre 15, 2021.

Ginsunod niya ang quarantine process kag sa ikaduha nga adlaw sang pag-quarantine nakitaan siya sang sintomas gani ginpaidalom sa RT-PCR test kag Disyembre 20 sang nagpositibo siya sa COVID-19.

Gilayon nga ginpadala ang iya specimen sa Philippine Genome Center para sa genome sequencing.

Ginpahayag naman ni Em Ang, Executive Director sang EOC nga nakatapos na isolate ang OFW kag asymptomatic na gani ginpasugtan nga makaguwa sa isolation facility kag makabyahe.

Disyembre 31 sang nag-abot ang OFW sa Bacolod City agud kadtuan ang iya asawa nga naga-trabaho sa BPO company sa siyudad. Liwat nga ginpaidalom sa hotel isolation ang OFW sa Bacolod City.

Gin-athag man ni Ang nga tumandok sang Mindanao ang lalaki kag taga-Pampanga ang iya asawa. Wala sila sang balay sa Bacolod City kundi nagtabu-ay lang sa siyudad agud iselebrar ang bag-ong tuig.

Enero 1, 2022 sang nagguwa ang resulta sang genome sequencing kag natukiban nga positibo ang OFW sa Omicron variant, dugang ni Ang.

Ginpaidalum liwat sa RT-PCR test ang OFW kaina sang aga, Enero 3, kag ginkumpirmar ni Ang nga POSITIBO ang resulta. Magkaupod nga naka-isolate sa hotel ang mag-asawa.

Ginahulat pa ang resulta sang RT-PCR test sang asawa. Ginpalawig na lang sang pito ka adlaw ang isolation sang OFW bangud sa pagpositibo niya liwat sa COVID-19 pero gin-athag ni Ang indi na siya sang “infectious.”

Ginapanindugan man ni Ang nga wala sang local transmission sang Omicron variant sa Bacolod City kundi nakuha niya ini sa abroad.

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post Ilonggo one-legged triathlete Rodolfo “Rudy” Fernandez, napatay sa edad nga 75
Next post Mga travelers nga mapadulong sa Iloilo City halin sa mga lugar sa Western Visayas, indi na kinahanglan magpa-RT-PCR test pag-abot sa siyudad