2 patay sang nagbungguanay ang 2 ka motorsiklo sa Leon
ILOILO — Patay ang driver sang duha ka motorsiklo nga nagbungguanay sa Barangay Ligtos, Leon, las-4:30 sang hapon sang Enero 9.
Base sa impormasyon ni Police Lieutenant Melchor Tolentino, hepe sang Leon Police Station, pakadto sa direksyon sang Barangay Buga ang motorsiklo nga ginamaneho sang 17-anyos nga menor-de-edad nga residente sang Barangay Dusacan, Leon.
Pag-abot sang menor-de-edad sa Barangay Ligtos, nagbungguanay sila sang kasumalang nga motorsiklo nga ginamaneho ni Ronel Calibayan, 30-anyos, sang Barangay Bulwang, Leon.
Gindala sa ospital ang duha ka driver, pero gindeklarar nga napatay bangud sang pilas sa nagkalain-lain nga parte sang lawas.