ADVISORY | Extended sang 2 ka bulan ang validity sang driver’s license nga manug-expire subong nga Enero, Pebrero kag Marso–LTO

ILOILO CITY – Indi kinahanglan nga magginutok sa Land Transportation Office 6 ang mga naga-uyat sang driver’s license nga manug-expire subong nga Enero, Pebrero, kag Marso.

Ini ang ginpangabay ni LTO 6 Director Eric Tabaldo bangud gin-extend ang validity sang mga lisensiya sang duha ka bulan. Ang lisensiya nga ma-expire subong nga Enero, ginpalawig ang validity sa Marso; ang sa Pebrero, gin-extend tubtob Abril; samtang ang ma-expire sa Marso, puwede pa nga magamit tubtob sa Mayo.

Gin-athag man niya nga wala sang additional charges nga ipatuman ang LTO. Una na ginpahayag ni Tabaldo nga nagapatuman ang ila opisina sang “No Appoint, No Entry” policy agud malikawan ang pagginutok sang mga tawo bilang paghalong batok sa COVID-19. –with news report from Aksyon Dave Bucayan