May 25, 2022

Panaysayon sang mga testigo sa Claire Diergos case base sa mga judicial affidavit kag police investigation report nga gin-file sang Special Investigation Team sa Provincial Prosecutor’s Office

Read Time:10 Minute, 30 Second

ILOILO – Walo ang na-identify sang Special Investigation Team nga ginkasuhan may kaangtanan sa kamatayon ni Claire Diergos, ang babaye nga nasapwan sa gin-abandonar nga salakyan sa Brgy. Inangayan, Sta. Barbara sang Oktubre 26, 2021 sang hapon.

Ini ang na-establisar sang Aksyon Radyo Iloilo base sa mga judicial affidavit kag police investigation report nga gin-file sa Provincial Prosecutor’s Office kadungan sa pag-file sang kaso nga murder sang Enero 5, 2022.Una nga nag-request ang Aksyon Radyo sa Special Investigation Team sang Iloilo Police Provincial Office sang kopya sang mga dokumento kag pangalan sang ginpangkasuhan.

Pero nagbalibad ang police kag ginrason nga maigo ang privacy sang mga ginpangkasuhan.Sunod nga nagpadala ang Aksyon Radyo Iloilo sang formal letter request sa Provincial Prosecutor’s Office nga nagapangayo sang kopya sang mga dokumento may kaangtanan sa kaso agud nga ma-report sa publiko ang factual kag accurate nga mga impormasyon.

Nagpahanugot naman ang Provincial Prosecutor’s Office kag nag-provide sang kopya sang mga judicial affidavit kag investigation report sang police.

MGA FACTS SA POLICE INVESTIGATION

Napatay si Diergos bangud sang pilas sang pagkabuno kag paglaslas sa liug. Sa medico-legal report nga pirmado ni Dr. Joe Martin Fuentes sang Crime Laboratory 6, napatay ang biktima anum ka oras pagkatapos sang iya katapusan nga pag-kaon, ukon ginabanta las-11 sang gab-i tubtob tungan gab-i sang Oktubre 24, 2021. Kaupod ni Diergos sa iya balay sa Deca Homes sa Pavia ang iya bata kag bag-o nga timbang nga si Rudelyn Sumbong nga nagsugod trabaho sang Oktubre 24, 2021. Sa pag-imbestigar kay Rudelyn, ginhambal niya nga mga las-8:30 sang gab-i sang Oktubre 24, nag-abot sila sa balay ni Diergos matapos nagpanyapon sa resort sa Oton sang mga las-6:30 sang gab-i.

Suno kay Rudelyn, ginhambalan siya ni Diergos nga didto siya matulog sa katre sa kitchen area. Matapos nga nanghimos, ginpamangkot ni Rudelyn si Diergos kun siraduhan na niya ang gate, pero ginhambalan siya nga indi lang bangud siya na (si Diergos) ang masirado sini. Dugang ni Rudelyn, nagtanyag siya nga sibinan ang bata ni Diergos, pero naghambal ang iya ama nga siya na lang ang mahimo sini. Matapos sini, gin-alegar ni Rudelyn nga nagtulog na siya, pero nakabugtaw sang nabatian nga nagatubod ang tubig sa gripo kag nakita niya nga ginasibinan ni Claire ang iya bata.

Ginpahayag ni Rudelyn nga nagbalik siya tulog kag nagbugtaw las-5:30 sang kaagahon sang Oktubre 25, 2021 kag nanotisyahan nga wala na ang Montero Sport nga salakyan sang iya amo sa parking area. Sang ginpangita sang bata si Diergos, nagsabat lang si Rudelyn nga nagtrabaho na ang iya iloy. Suno sa timbang, wala siya sang nanotisyahan nga unusual sang nagpanglimpyo sa balay. Wala man siya nagkabalaka sang wala nakapauli si Diergos sang Oktubre 25 bangud ‘gin-assume’ niya nga nag-overtime ini sa trabaho.

Sang Oktubre 26, nag-text si Rudelyn kay Diergos kag nagpamangkot kun paano gamiton ang gas burner kag wala na sang pagkaon ang iya bata. Sa imbestigasyon naman sang police sa ginpahayag nobyo ni Rudelyn sa Northern Iloilo, nagtawag sa iya si Rudelyn mga las-nueve sang gab-i sang Oktubre 24 kag nagpahibalo nga naka-abot na sila sa ‘boarding house’ sa Iloilo City upod sa iya nga ‘Maam Claire’ nga nagatrabaho nga call center agent. Kaupod man nila suno kay Rudelyn ang bata sang iya ama kag nagpanyapon sila sa Oton.

Sang Oktubre 25, 2021, mga las-8:15 sang aga, liwat suno sa nobyo nga nagtawag si Rudelyn kag nanugid nga may hematoma siya sa paa.Nabutang sa investigation report nga pito ka beses nga nagtawag si Rudelyn sa iya nobyo sang Oktubre 23, duha ka beses sang Oktubre 24, 20 ka beses sang Oktubre 25 kag 18 ka beses sang Oktubre 26, 2021.

PANAYSAYON SANG TIMBANG NGA GINBUSLAN NI RUDELYN SUMBONG

Ginbuyagyag sang anay timbang ni Diergos nga may ka-istorya nga lalaki ang iya ama sa cellphone mga las-10 sang aga sang Oktubre 23, 2021. Nabatian niya nga may ka-istorya nga lalaki ang iya nga ama kag nabatian niya nga akig ang tingog sa pihak nga linya nga naghambal, “gusto mo mag-met up kita eh” kag nagsabat si Diergos nga, “indi ko, may meeting pa ako.” Pagkatapos sini, ginbutang ni Diergos ang iya cellphone sa silent mode.

Ginsaysay man sang anay timbang nga nanyapon sila sa kalan-an sa Jaro sang Oktubre 2021 (pero wala niya na-specify ang petsa). Suno sa anay timbang, samtang naga-order si Diergos sa counter, nakita niya nga may babaye nga makapila ka beses nga nagtulok sa iya ama. Gin-identify sang anay timbang ang babaye nga amo si Sally Lopez, asawa ni former San Dionisio Mayor Peter Paul Lopez. Gin-alegar sang police nga ang pamilya Lopez ang nagapanag-iya sang kalan-an.Oktubre 24, 2021 sang naghalin ang anay timbang kag ginbuslan siya sang amo man nga adlaw ni Rudelyn Sumbong.

SIN-O SANDAY RAFFY SORIOSO KAG GARDO IBRAHIM?

Duha ka lalaki ang nakita nga may ginatuwangan nga mabug-at nga naputos nga bagay pagguwa sa balay ni Diergos mga las-4:20 sang kaagahon sang Oktubre 25, 2021.Ginsaysay sang isa sa mga testigo nga nakita niya nga dali-dali nga ginkarga sang duha ka lalaki ang mabug-at nga bagay sa back seat sang grey nga Montero Sport nga naka-park sa atubang sang balay ni Diergos. Nagpungko sa driver seat ang isa ka lalaki, samtang sa passenger seat ang isa pa, kag ila nga ginmaneho ang salakyan pagguwa sa subdivision.

Suno sa testigo, may chubby nga babaye nga may malaba sang buhok nga nagsirado sang main gate sang balay ni Diergos sang nakalakat ang salakyan. Nagasiga suno sa iya ang suga sa sulod sang balay. Positibo nga gintudlo sang testigo ang iya mga nakita, paagi sa mga litratro nga ginpakita sa iya sang police nga sanday Raffy Sorioso nga amo ang nag-drive sang Montero kag ang nagapungko sa passenger seat si Gardo Ibrahim, samtang ang babaye nga nagsirado sang gate amo si Rudelyn Sumbong. Ginkumpirmar sang mag-asawa nga Peter Paul Lopez kag Sally Lopez sa interview sang police nga tinawo nila sanday Sorioso kag Ibrahim nga ila gina-employ nga driver kag aide ilabe na sa election period. Nanginwala ang mag-asawa nga may ihibalo sila sa lokasyon sang duha.

Sa affidavit naman ni PSSg Icen Hower Belonio nga assigned sang una sa San Dionisio MPS, gin-identify niya sanday Sorioso (tumandok sang Poblacion, San Dionisio) kag Ibrahim (tumandok sang Bagacay, San Dionisio) nga nagapang-empleyo sa mag-asawa nga Lopez bilang personal bodyguard kag driver, sang si Peter Paul pa ang mayor sa San Dionisio.Base man sa affidavit ni PSSg Belonio, ang grey Montero Sport ang isa sa mga service vehicles nga bulos-bulos nga ginamaneho nanday Sorioso kag Ibrahim sa termino ni former Mayor Peter Paul Lopez.

PAGTUDLO SA MGA LOPEZ

Ginsaysay sang isa ka testigo nga samtang naga-drive siya sang motorsiklo sang Oktubre 25, 2021 sang kaagahon, may nakita siya nga babaye kag lalaki nga nagpanaug sa Pajero nga naka-park sa atubang sang Provincial Equipment Pool Division (motorpool), tupong lang sang grey nga Montero Sport nga naka-park naman sa tabok sang karsada, sa Brgy. Inangayan, Sta. Barbara. Nakita sang testigo nga nagbutang ang babaye nga sakay sang Pajero sang early warning sign sa karsada. Nakita niya man nga nagabaisay ang babaye kag lalaki. Gin-athag sang testigo nga indi niya kilala ang duha, pero na-identify niya sang ulihi paagi sa mga pictures nga ginpresentar sa iya sang mga pulis. Na-identify niya ang lalaki nga amo si Peter Paul Lopez samtang ang babaye amo si Sally/Saliha Lopez.

Dugang sang testigo, sang naglabay siya liwat sa area pagbalik niya sa tunga-tunga sang mga 5:20 tubtob 5:50 sang kaagahon sang Oktubre 25, wala na ang Pajero, pero may pula naman nga salakyan nga iya ginasundan nga gulpi nagdulog sa likod sang Montero Sport kag nakita niya nga nagsid-ing sa sa bintana sang Montero Sport ang duha ka sakay. Sang ginpresentar sa iya sang police ang mga litrato, na-identify niya ang duha ka lalaki nga sanday Felix Paul Lopez kag Carlos Paul Lopez.

Suno naman sa isa pa ka testigo, mga las-2:30 sang hapon sang Oktubre 26, may nakita siya nga nagdulog sa tunga sang karsada nga pula nga salakyan nga nagtuga pa sang pagpugok sang trapiko. Nakita sang testigo nga nagkuha ang babaye nga pasahero sang litrato sang Montero Sport gamit ang cellphone. Pagkaligad sang pila ka minutos, naglakat man ang pula nga salakyan kag naglabay sa ila atubang. Indi kilala sang testigo ang babaye nga pasahero kag ang lalaki nga naga-drive. Pero gintudlo niya ang mga ini sa mga litrato nga ginpakita sa iya sang mga pulis. Nahibaluan lang sang ulihi sang testigo sa police files nga ang pangalan sang mga sakay sang pula nga salakyan amo sanday Carlos Paul Lopez kag Sally/Saliha Lopez.

RELASYON NI DIERGOS KAY CHRISTIAN PAUL “CHAD” LOPEZ

Ginbuyagyag sang isa pa ka testigo nga nakapanugid si Diergos nga may relasyon sila ni Christian Paul “Chad” Lopez, bata nanday Peter Paul kag Sally Lopez. Nakabutang sa affidavit nga Enero 2021 sang nagpanyaga ang testigo kag si Diergos sa kalan-an sa Jaro. Nakita niya nga sang nagpanaug sa salakyan si Diergos, nag-istoryahanay sila ni Chad.

Nanotisyahan niya man nga may babaye nga masakit ang panulok kay Diergos (nga iya na-identify sang ulihi nga amo si Sally Lopez). Sang nagpauli sila, ginsugid niya ang obserbasyon kay Diergos, kag nagtuad ini nga nga may relasyon sila ni Chad, pero nagapamatok sa ila relasyon ang pamilya Lopez. Naplastar man sa investigation report nga nagaduda ang pamilya Lopez nga si Chad ang amay sang bata ni Diergos bangud nahibaluan nila nga Lopez ang apelyido sang tatay sang bata.Nanugid man suno sa iya si Diergos nga nagapangaluyag sa iya si Peter Paul Lopez, kag nagakabalaka ini kun mahibaluan sang asawa. Ginhambal ni Diergos sang amo nga tiun nga ginakulbaan siya bangud nanotisyahan nga may mga nagasunod-sunod sa iya.

‘MAY UNUSUAL SWEETNESS’

Base naman sa affidavit sang isa pa ka anay timbang ni Diergos, Setyembre 28, 2020 sang ginpakilala sa iya sang iya ama si Chad. Sang amo nga petsa, pakadto sila sang iya ama sa Iloilo City, sakay sa Montero Sport nga ginamaneho ni Diergos. Nagdulog sila sa isa ka area sa diin nagsakay ang lalaki nga ginpakilala ni Diergos nga si Chad nga nagbulos sa pagmaneho sang salakyan pakadto sa mall sa La Paz. Nagpakigkita diri si Diergos sa isa pa ka testigo nga iya man ginpakilala kay Chad. Sa affidavit sang amo nga testigo, ginsaysay niya nga Oktubre 28, 2021 sang nakilala niya si Chad Lopez nga iya na-identify sang ulihi paagi sa Facebook account kag PNP record nga amo si Christian Paul Lopez. Ginpabutyag man sini nga nanotisyahan niya nga may ‘unusual sweetness’ sa tunga nanday Diergos kag Chad. Sa affidavit sang isa pa ka testigo, nakabutang nga ginpakilala sa iya ni Diergos si Chad sang nagkadto siya sa balay ni Diergos sang Oktubre 27, 2019 sang gab-i.

VIDEO INTERVIEW RECORDING SA BATA NI DIERGOS

Ginsunod sang mga pulis ang mga patakaran sa child examination sang ginpaagi sa interview ang bata ni Diergos.Sa affidavit ni PMAJ Liza Nofuente, chief sang Women and Children’s Protection Desk sang IPPO, nagpangayo sila sang bulig sa DSWD kag nag-coordinate man sa Buenavista, Guimaras police para masiguro nga nabase sa rules ang video interview sa bata. Natukiban sa actual examination, base sa affidavit ni PMAJ Nofuente, nga naghambal ang bata sang “bad” matapos ginpakitaan sang litrato nanday Raffy Sorioso kag Peter Paul Lopez. Sang ginpakitaan naman sang picture ni Sally Lopez, “she was shaking and looked scared” base sa affidavit.

READ [IMBESTIGASYON KAY RUDELYN SUMBONG]: https://bit.ly/3qoYcEl

READ [STATEMENT SANG ANAY TIMBANG NI DIERGOS]: https://bit.ly/31W9uq8

READ [PANAYSAYON SANG TESTIGO NGA NA-IDENTIFY KANDAY RAFFY SORIOSO, GARDO IBRAHIM KAG RUDELYN SUMBONG]: https://bit.ly/3I0gvpf

READ [PANAYSAYON SANG TESTIGO NGA NAG-IDENTIFY SA MAG-ASAWA NGA PETER PAUL KAG SALLY LOPEZ, MAG-UTOD NGA FELIX PAUL KAG CARLOS PAUL LOPEZ]: https://bit.ly/3zRi2v0

READ [STATEMENT SANG TESTIGO NGA NAG-IDENTIFY KANDAY SALLY LOPEZ KAG CARLOS PAUL LOPEZ]: https://bit.ly/3GvINru

READ [STATEMENT SANG MGA TESTIGO SA RELASYON NI DIERGOS KAY CHRISTIAN PAUL LOPEZ]: https://bit.ly/3K4BBEF

READ [AFFIDAVIT SA IPPO-WCPD SA RESULTA SANG VIDEO INTERVIEW RECORDING SA BATA NI DIERGOS]: https://bit.ly/3Fn098y

Happy
Happy
0 %
Sad
Sad
50 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
50 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post Timbang ni Claire Diergos nga si Rudelyn Sumbong, handa nga atubangon ang kaso nga ginpasaka sa iya may kaangtanan sa pagkapatay sang iya amo; Timbang, ginapanginwala ang kahilabtanan sa krimen
Next post Breaking: Former Iloilo City Councilor Atty. Joshua Alim, napatay sa edad nga 57