Breaking: Former Iloilo City Councilor Atty. Joshua Alim, napatay sa edad nga 57

ILOILO CITY – Napatay ang anay konsehal sa syudad nga si Atty. Joshua Alim sa edad nga 57.

Ginkumpirmar ni Judgie Alim, utod ni former Councilor Alim, nga napatay ang iya utod sa ospital kaina sang kaagahon. Cardiac arrest suno sa iya ang rason sang pagkapatay sang anay konsehal.

Suno naman kay former Councilor Plaridel Nava, handa na kuntani si Alim nga magpa-kidney transplant, pero nagpangibabaw ang iya handum nga liwat magserbisyo sa mga taga-syudad gani nga nagpadalagan sa pagkakonsehal sa 2022 elections.

Si Alim ang natawo sang Setyembre 13, 1964 sa Surallah, South Cotabato.

Nagtapos siya sang Bachelor of Arts degree, Major in Political Science sang 1985 kag Bachelor of Laws sang 1990 sa Central Philippine University. Nakapasar siya sa Bar Exam sang 1990.

Nakatapos siya sang Master in Business Administration sang 2002 sa International Academy of Management and Economics, kag sang 2017, natapos niya ang Master of Laws sa San Beda College.

Nagserbisyo si Alim bilang konsehal sa Iloilo City sang 18 ka tuig, kag naka-author sang madamo nga mga ordinansa kag resolutions.

Si former Councilor Alim ang nakilala sa iya adbokasiya sa urban poor, human rights kag anti-smoking sa Iloilo City.

Si Alim nga isa man ka realtor ang nangin Law Professor sa CPU kag nangin media practitioner. –with additional information from CPU