Dalagita, naglumpat halin sa 2nd floor sang balay sa North Baluarte, Molo
ILOILO CITY – Gindala sa ospital ang 17-anyos nga dalagita matapos naglumpat halin sa second floor sang balay nga ila ginatiniran sa North Baluarte Molo mga las-11 kagab-i.
Suno sa barangay tanod nga naga-roving sa lugar, nabatian niya nga may naglagpok kabangdanan nga ila gin-check.
Nakit-an na lang nila ang babaye nga nagahapaun na sa duta kag naga-reklamo sang pagpalanakit sa iya nga tiil.
Ginpahayag sang live in partner sang babaye nga may gin-awayan sila antes naglumpat ang dalagita.
Nagpamalibad naman siya nga maghatag sang dugang nga detalye.
Pangayaw lang sa siyudad ang dalagita kag temporaryo sila nga nagatenir sang iya live-in partner sa North Baluarte, Molo.