ICPO, indi mangdakop pero manaway lang kun i-implementar ang ordinansa sa Iloilo City nga naga-restrict sa hulag sang mga residente nga indi bakunado- PMajor Shella Mae Sangrines

I-exercise lang sang Iloilo City Police Office ang maximum tolerance kun ma-implementar ang ordinansa nga naga-restrict sa hulag sang mga residente sa Iloilo City nga indi bakunado batok sa COVID-19.

Suno kay Police Major Shella Mae Sangrines, spokesperson sang ICPO kag hepe sang Police Station 1, manaway lang sila kag indi mangdakop sa mga indi bakunado.

Magluwas lang suno kay Sangrines kun may specific nga violation ang offender sa nasambit nga ordinansa.

Nagpanugyan si Sangrines sa mga residente sa siyudad nga ipaiway ang paguwa sa panimalay kun wala man lang sang importante nga kadtuan.

Nabutang sa ordinansa nga ang mga wala nabakunahan kag ang mga indi fully vaccinated ang indi maka-gwa sa ila balay magluwas lang kun para sa essential goods and services, basta nga mag-presentar sang negative RT-PCR test result.

Ginadumili-an man ang pagsulod sa mga mall, restaurants, hotels, kag iban pa nga kapareho nga establisyimento. — via Aksyon Hotline