Mga kandidato sa May 9 elections ukon ila representatives, ipatawag sang City Comelec subong nga adlaw agud edukaron sa mga lugar nga pwede butangan sang mga campaign posters kun magsugod na ang campaign period

ILOILO CITY — Ipatawag subong nga adlaw sang City Comelec ang mga kandidato ukon ila mga representatives, subong man coordinators sang mga national candidates kag party-list groups sa siyudad para edukaron kun diin nga lugar mahimo makatakod sang ila mga campaign posters ukon campaign paraphernalia kun magsugod na ang campaign period para sa 2022 elections.

Ginpahayag ni City Comelec Election Assistant 2 Mr. Jonathan Sayno, nga iga-raffle man ang lugar kun diin nga portion sang common poster area pwede makapatapik sang campaign posters ang mga kandidato.

Base sa Republic Act 9006 ukon ang Fair Election Act, ang Comelec ang magadesignar sang common poster areas pareho sang mga plaza.

Pwede man nga makatakod sang campaign posters sa mga private properties suno kay Sayno pero kinahanglan may pahanugot sang tag-iya.

Sa subong, wala pa sang salabton ang mga kandidato ukon ila mga supporters nga magpanapik sang mga posters sa bisan diin nga lugar bangud wala pa nagsugod ang campaign period suno kay Sayno.

Pebrero 8 masugod ang campaign period para sa mga national candidates, samtang Marso 25 naman sa mga local candidates.