ADVISORY | 12-oras nga power interruption, ma-eksperyensiyahan sa Iloilo City sa Pebrero 26 bangud sa preventive maintenance sang NGCP
ILOILO CITY – Ma-eksperyensiyahan ang 12 ka oras nga power interruption sa Iloilo City sa Pebrero 26 halin las-6 sa aga tubtob las-6 sa kasisidmon.
Base sa advisory sang MORE Electric and Power Corporation, may himuon nga maintenance sa 50 MVA Power Transformer ang National Grid Corporation of the Philippines (NGCP) kag nagahingyo nga i-shutdown ang Sta. Barbara Power Barge 69KV line bangud sa correction nga paga-ubrahon.
Kadungan sang himuon nga preventive maintenance services sang NGCP, hingalitan sang MORE Power nga makahimo sang parallel line works sa diin tutukan ang pag-ilis kag pagpatindog sang bag-o nga poste kag hotspot corrections sa pila ka mga feeder lines.
Lakip sa maapektuhan ang bug-os nga La Paz Substation; City Proper Feeder 2; kag porsyon sang City Proper feeder 1; bug-os nga Jaro substation, bilog nga Mandurriao substation, bug-os nga Megaworld substation lakip na ang porsyon sang Brgy. Tabucan kag San Rafael, Mandurriao.
Maka-eksperyensiya naman sang walo ka oras nga power interruption ang bug-os nga Molo substation, City Proper Feeder 3 kag 4 kag porsyon sang City Proper Feeder 1 bangud sa line configuration nga paga-ubrahun sang MORE Power.
Ginpaathag sang MORE power nga ang ini nga aktibidad ang isa lang sa madamo pa nga preparasyon sang MORE Power para sa palaabuton nga summer, bangud ginapaabot ang pagbag-o sang demand sa kuryente kag para man sa palaabuton nga eleksyon, agud mapasigurado ang estable nga supply sang kuryente.
