Babaye nga nasapwan nasulod sa sako sa higad sang highway sa Brgy. Pasil, New Lucena, wala sang patimaan nga ginhimuslan — New Lucena Police

NEW LUCENA, ILOILO – Wala sang patimaan nga ginhimuslan si Jonalyn Sucaldito, ang babaye nga nasulod sa sako kag nasapwan sa higad sang highway sa Brgy. Pasil, New Lucena sang Marso 2 sang aga.

Suno ini kay Cpl. Robertson Jamandron, imbestigador sang New Lucena Police Station, base man sa pag-autopsy sa bangkay sang biktima nga gin-conduct ni Dr. Joe Martin Fuentes, medico-legal officer sang Police Regional Office 6.

Ginpahayag ni Jamandron nga base sa conclusion ni Fuentes, multiple gunshot wounds lang ang ginkamatay ni Sucaldito.

Tatlo ka mga pilas ang naagum sang biktima suno kay Jamandron—duha sa iya nga ulo kag isa sa pulso. Nagapati naman ang police nga indi lang isa ka tawo ang may kahimuan sang krimen bangud indi mahimo nga iwigit sang suspect ang bangkay kun wala siya sang kaupod suno pa kay Jamandron.

Samtang, ginpa-enhance na sang kapulisan ang CCTV footage nga ila nakuha sa diin, katapusan nga nakit-an si Sucaldito nga nagsakay sa awto.

Katuyuan sini nga maathag ang plate number sang salakyan agud makilala kun sin-o ang tag-iya sini.