Mga PUJs halin sa kabanwahanan sa probinsya, tubtob na lang sa mga passenger terminals sa tiun nga ipatuman na ang Local Public Transport Route Plan — PSTMO Head Jeck Conlu
ILOILO CITY — Kabahin sang ipatuman nga Local Public Transport Route Plan (LPTRP) sang Iloilo City Government ang desisyon nga tubtob na lang sa mga passenger terminals ang mga public utility jeepneys halin sa kabanwahanan sa probinsya.
Suno kay Public Safety and Transportation Management Office (PSTMO) Head Jeck Conlu, Nobyembre pa sang nagligad nga tuig sang gin-aprubahan sang Department of Transportation (DOTr) ang LPTRP sang siyudad.
Sa idalum sang LPTRP, ilisan ang tanan nga traditional jeepneys sa modernized jeepneys kag may mga bag-o nga ruta.
Gin-athag ni Conlu nga makapila ka beses nga gintuyo sang city government nga ilakip sa plano ang pagbiyahe sa siyudad sang mga PUJs halin sa first towns apang gin-reject sang DOTr bangud sa overlapping sang mga ruta.
Ini ang rason suno sa iya kun ngaa sa final LPTRP nga gin-aprubahan sang DOTr, tubtob na lang sa mga terminals ang mga PUJs halin sa mga banwa.
Ang mga city loop jeepneys amo ang ma-cater sang mga pasahero halin sa terminal pakadto sa city proper.
Sa Marso 24, suguran na sang Land Transportation Franchising and Regulatory Board (LTFRB 6) ang selection sang mga ruta nga i-award sa mga transport cooperatives. — via BBB
