‘New Normal na ini’ — Iloilo City COVID-19 team spokesperson Jeck Conlu sa pagpaidalum sa siyudad sa Alert Level 1 sugod Marso 11
ILOILO CITY – Mabalik na sa 100 percent ang capacity sang mga economic activities kag business establishments sugod sa pagpaidalom sa Iloilo City sa COVID-19 Alert Level 1 nga nag-epekto las-12 sang tungang gab-i.
Ini suno kay Iloilo City COVID-19 team Spokesperson Jeck Conlu kun basehan ang guidelines pero magapabilin ang pagsunod sa minimum health protocols pareho sang pagsuksok sang face mask kag pagpanghugas sang kamot.
Pasugtan naman ang 100 percent capacity sa mga public utility jeepneys (PUJs) kag ibalik na ang mga contact sports.
Sa idalom sang Alert Level 1 suno kay Conlu, ginapasugtan na ang face-to-face classes. Suno kay Conlu, kinahanglan gid nga makabalik sa new normal ang siyudad agud liwat nga mabuhi ang mga negosyo nga naapektuhan sang pandemya kag mabatak ang ekonomiya sang siyudad.
Magapabilin naman ang mga measures nga ginapatuman sa mga establishments pareho sang pag-check sang temperature antes magsulod.
Halin Marso 1, napaidalom ang siyudad sa Alert Level 2 pero nag-apelar si Mayor Jerry Treñas nga ipaidalom na lang ini sa Alert Level 1 bangud sa naganubo nga kaso sang COVID-19.
