Taiwan, nagakinahanglan sang English teachers – DOLE
Ginpahibalo sang Department of Labor and Employment (DOLE) nga nagakinahanglan sang mga English Teachers ang Taiwan.Posible nga indi magsobra sa P115,000 ang mabaton nga sweldo sang English teacher suno sa DOLE.
Nagalab-ut sa 450 teaching positions ang pagabuksan sang Ministry of Education sang Taiwan para sa mga foreigners nga manunudlo sa primary kag secondary public schools subong nga tuig.
Kabahin ini sang plano sang gobyerno sang Taiwan nga himuon nga secondary language ang English pag-abot sang 2030.
Sa idalum sang Taiwan Foreign English Teacher Program (TFETP), magluwas sa sweldo nga NT$62,720, may iban pa nga benepisyo nga mabaton ang English teacher pareho sang travel subsidy kag health insurance.
Apang magadepende ini sa educational attainment sang manunudlo suno sa DOLE.
Ang mga aplikante ang kinahanglan proficient sa English, may Bachelor’s degree ukon higher degree kag wala sang criminal record.
Bisan wala nalakip sa mga requirements, makabulig kun may license ukon teaching credentials ang aplikante.Bukas ang application tubtob Marso 31, 2022 kag mahimo mag-apply online sa https://tfetp.epa.ntnu.edu.tw .
Suno sa DOLE, may 193 ka mga Filipino teachers subong sa Taiwan. — with reports from DOLE, GMA
