Hepe sang Zarraga MPS, ginpangayuan sang paathag sang IPPO bangud lain nga tawo ang ginserbihan sang warrant of arrest
ILOILO – Ginpangayuan sang paathag ni Iloilo Police Provincial Office (IPPO) Director Police Colonel Adrian Acollador si Police Major Aldrin Lamera, hepe sang Zarraga Police Station, bangud sa sala nga suspek ang ila gin-aresto sa Barangay Salvacion, Murcia, Negros Occidental sang Marso 18, 2022.
Suno kay Acollador, ginahulat pa niya ang sabat ni Lamera matapos ginsulatan agud nga magpaathag. “Basi nagkulang lang sa further verification,” suno kay Acollador.
Base sa report nga nakalab-ut kay Acollador, may impormasyon nga nabaton ang Zarraga police kun sa diin nagatenir ang suspect sa kaso nga murder nga natabo sang Mayo 30, 2002 sa Barangay Jalaud Norte, Zarraga.
Bangud sa impormasyon, nagbiyahe ang Zarraga police padulong sa Murcia, Negros Occidental dala ang warrant of arrest nga nakapangalan kay Cris Parcia.
Sang na-aresto na si Cris Parcia, gindala siya sa Zarraga Police Station kag ginpaatubang sa testigo sang nasambit nga kaso. PERO ginpahayag sang witness nga indi ini ang suspek sa nasambit nga krimen.
Magpakapareho ang ngalan kag apelyido sang suspek sa krimen kag ang lalaki nga gin-aresto sa Murcia, Negros Occidental pero lain lang ang ila middle name.
Liwat nga gin-check sang Zarraga police sa korte kag nahibaluan nga may kapareho nga pangalan ang suspek nga si Cris S. Parcia gani nasal-an lang si Cris Lachica Parcia nga tumandok sang Murcia.
‘ANG AKON NGA DUNGOG DAW NAGUBA SANG AMO NA’ – CRIS L. PARCIA
Gina-istoryahan pa sang pamilya ni Cris L. Parcia ang ila masunod nga tikang kun mareklamo batok sa Zarraga police kasunod sang natabo. Suno sa iya, kasubong ng naguba ang iya dungog bangud sa natabo.
Gin-ako man niya nga ang ila pamilya pa ang naggasto sang iya pamasahe sang nagpauli siya sa Negros Occidental matapos nga gin-release sang Zarraga police.
Sa pihak sang natabo, nagapasalamat siya bangud nakatapak siya sa Iloilo.
