9 ka tuig nga bata nga lalaki, patay sang nalumos sa baybay nga sakop sang North Baluarte, Molo

ILOILO CITY – Dead-on-arrival sa ospital ang siyam ka tuig nga bata nga lalaki nga nalumos sa baybayon nga sakop sang North Baluarte, Molo kahapon, Marso 26.

Ini ang ginkumpirmar sang iya iloy nga si Edna Locsin, 42-anyos. Suno sa iloy, pag-abot sa emergency room sang ospital wala na sang heart beat si Marmar bangud madugay na siya nga yara sa idalum sang tubig.

Wala naman makalisensya ang biktima nga mapadulong siya sa seawall sa sulod sang Iloilo Fishing Port Complex agud magpaligo.

50 metros halin sa ginlumpatan ni Marmar nakit-an ang iya lawas nga nagakulob na kag naipit sa duha ka mga dalagko nga bato.

Suno naman kay alyas EJ, apat sila sang nagkadto sa seawall apang nagpanghagad si Marmar nga malumpat sa tubig.

Mga la-una sang hapon sang gin-report nga nalumos ang bata kag las-3:13 sang nakit-an sang mga rescuers ang iya lawas kag las-3:30 naman sang gindeklarar nga napatay ang biktima.