Indian national, nasapwan patay sa sulod sang iya balay sa Estancia, Iloilo

ILOILO — Patay na kag may mga pilas sang pagkabuno sang nasapwan sa sulod sang iya nga balay ang Indian national sa Brgy. Cano-an, mga las-8:30 kahapon sang aga, Marso 27.

Suno kay Lt. Jobert Amado sang Estancia Police Station, base sa ila inisyal nga imbestigasyon, may mga pilas sa dughan kag kilid ang biktima.

Misunderstanding ukon indi pag-intindihanay ang ginalantaw nga anggulo sang police sa krimen.

Posible suno kay Amado nga may pagbaisay kag pukutay nga natabo antes ginpatay ang biktima base man sa sitwasyon sang crime scene.

Na-recover ang kutsilyo nga posible gingamit sa krimen nga ginabanta walo ka pulgada ang kalabaun.

Padayon pa ang inventory sang kapulisan kun may mga nagkaladula sa sulod sang balay.

Nadiskubrehan ang bangkay sang biktima sang nagkadto sa iya balay ang kaupod niya nga nagapangolekta sang ila mga pautang.

Dugang pa ni Amado, indi magnubo sa duha ka tawo ang may kahimuan sa krimen.

May mga persons-of-interest na ang police nga posible kakilala man lang sang biktima.

Naghingyo naman ang pamilya nga indi na pagpangalanan ang Indian national. — via ARI correspondent Jerry Medina/Aksyon Kikik Enar