Trenta y dos porsyento nga gap ni Presidential Candidate Ferdinand “Bongbong” Marcos, Jr. kay VP Leni Robredo sa March 2022 survey, tuman ka layo suno sa Pulse Asia official

Dapat magtaas sang 16% ang rating ni Presidential Candidate, Vice President Leni Robredo sa masunod nga survey kag magnubo sang 16% ang rating ni former Senator Ferdinand “Bongbong” Marcos, Jr. agud mangin statistically tied sila.

Paathag ini ni Dr. Ana Maria Tabunda, Research Director sang Pulse Asia Research, Incorporated, sa resulta sang ila presidential survey sang Marso sa diin nagnubo sang 4% ang rating ni Marcos nga nakakuha sang 56%, samtang nagtaas sang 9% si Robredo nga may 24%.

Sa pihak sini, tuman gihapon ka layo sang gap nga 32% suno kay Tabunda agud makabig nga tie ang duha ka kandidato.

Dugang ni Tabunda, bisan magsaylo pa kay Robredo ang mga botante sang nabilin nga mga presidentiables, kulang gihapon ini agud maka-overtake siya kay Marcos.

Gin-athag ni Tabunda nga wala sang impluwensya ang survey sa actual nga resulta sang binotohay.

Pero ang resulta sang katapusan nga survey, halos naga-anggid sa actual results sang election.

Magahimo pa sang katapusan nga survey ang Pulse Asia subong nga bulan antes ang Mayo 9 nga eleksyon. –via Aksyon Hotline