Sangguniang Panlalawigan sang Guimaras, nanindugan nga wala sang konflikto sa tunga sang ordinansa may kaangtanan sa health declaration form, inbound pass kag IATF guidelines

GUIMARAS – “Gina-encourage” sang Department of Interior and Local Government (DILG) 6 ang Sangguniang Panlalawigan sang Guimaras nga i-revisit ang ordinansa sa Health Declaration Form kag inbound pass kun nagasantu sa guidelines sa nationwide implementation sang Alert Level System.

Ini paagi sa sulat nga ginpadala sang DILG 6 sa Sangguniang Panlalawigan, suno kay Guimaras Vice Governor John Edward Gando.

“Kun lantawon, waay kami sang may nakita nga conflict between the two – aton ordinansa kag IATF guidelines. Ang IATF guidelines, nagasiling nga ang paper-based contact tracing ukon health declaration form shall not be required for all the agencies and establishments. Ti ang amon nga panan-awan diri sa Sangguniang Panlalawigan, the term agencies itself does not include the local government units,” suno kay Gando.

Mapadala sang sabat ang Sangguniang Panlalawigan sa DILG 6 subong nga semana agud iplastar nga wala sang konflikto sa ordinansa kag guidelines sang IATF.

Hulaton sang Sangguniang Panlalawigan ang abiso sang mga health authorities sa Guimaras kun indi na kinahanglan ang health declaration form kag inbound pass antes i-revisit ang nasambit nga ordinansa.

Sang damlag lang, nagapanawagan ang pila ka mga pasahero nga dulaon na ang pag-fillout sang health declation form bangud nagapa-atrasar lang ini sa pagbyahe nila patabok sa Guimaras.