Iloy sang 3-year old nga gin-require sang negative RT-PCR test result antes makatabok sa Guimaras, ginkasuhan sang Guimaras provincial government bangud nagpauli sa Buenavista bisan wala pa ang resulta sang swab test sang bata

GUIMARAS – “Atubangon ko na lang.”

Ini ang sabat ni alyas Mel, ang iloy nga taga-Buenavista, Guimaras matapos nga ginkasuhan siya sang Provincial Government sa paglapas sang Provincial Ordinance No. 2020-04 kag Republic Act No. 11332 ukon “Mandatory Reporting of Notifiable Diseases and Health Events of Public Health Concern Act.”

Ginkumpirmar ni Mel nga nabaton niya ang subpoena sang Provincial Prosecutor’s Office sang Guimaras kahapon.

Si Mel ang iloy sang tatlo ka tuig nga bata nga gin-require sang negative RT-PCR test result antes pasugtan nga makatabok sa Guimaras.

BACKGROUND

Abril 4, 2022 sang gab-i, wala ginpasugtan nga makatabok ang pamilya ni Mel bangud wala sang negative RT-PCR test result ang iya tatlo ka tuig nga bata.

Halin sa banwa sang Vallehermoso, sa boundary sang Negros Occidental kag Negros Oriental, ang pamilya pagkatapos sang apat ka adlaw nga bakasyon.

Gin-athag ni Mel nga nabakunahan na siya batuk sa COVID-19 upod sa iya bana kag duha pa ka bata. Ang tatlo ka tuig na lang ang wala pa mabakunahan bangud wala pa ginapasugtan sang gobyerno ang vaccination sa amo nga age group.  

Napilitan ang pamilya ni Mel nga magtenir sa Parola Terminal. Pagkasunod nga adlaw, nag-una pauli ang bana kag duha ka bata ni Mel, samtang nagpabilin siya kag ang iya tatlo ka tuig nga bata.

Gin-ako ni Mel nga matapos swab sa iya bata, nagsakay sila sa RORO vessel bisan wala pa sang resulta bangud ginakapoy na ang bata.

PAATHAG SANG SCREENING TEAM LEADER

Ginpaathag ni Ms. Rosie Gotera, ang team leader sang naga-screen sa mga nagasulod sa Guimaras, nga nagasunod lang sila sa Executive Order sang probinsya sa diin nabutang nga kinahanglan magpresentar sang negative RT-PCR test result ang tanan nga unvaccinated individuals halin sa guwa sang Western Visayas nga matabok sa isla.  

Base sa EO suno kay Gotera, exempted lang nga magpresentar sang negative RT-PCR test result ang mga naga-edad duha (2) ka tuig panubo.

Libre naman suno kay Gotera ang swab test para sa mga residente sang Guimaras nga indi pa bakunado. –via Aksyon Hotline