3 ginrekomendar kasuhan sa pagpatay sa negosyante nga si Claire Diergos; pamilya ni former Mayor San Dionisio Peter Paul Lopez, wala bisan isa sa ginrekomendar kasuhan

ILOILO – Tatlo ang ginrekomendar sang Provincial Prosecutor’s Office nga kasuhan sang murder may kaangtanan sa pagpatay sa negosyante kag single mom nga si Claire Diergos, ang babaye nga nasapwan sa gin-abandonar nga salakyan sa Brgy. Inangayan, Sta. Barbara sang Oktubre 26, 2021.

Sa resolution nga pirmado ni Associate Provincial Prosecutor Shaun Cary Akot sang Abril 18, 2022, ginrekomendar nga kasuhan sanday Raffy Sorioso, Gardo Ibrahim kag Ma. Rudelyn Sumbong.

Wala bisan isa sa pamilya ni former Mayor Peter Paul Lopez sang San Dionisio ang nalakip sa ginrekomendar nga pasakaan sang kaso bangud sa “insufficiency of evidence.” Ginkumpirmar ini sang anay alkalde sa pagpakig-angut sa iya sang Aksyon Radyo Iloilo.

“Sa akon pagtan-aw, wala kami kahimo. We are innocent of what is being done to us. Ti the court has prevailed. Daku gid amon pasalamat nga ang korte gapamati man sang amon nga mga affidavit,” pahayag ni former Mayor Lopez.

Sanday Sorioso kag Ibrahim ang anay empleyado sang San Dionisio LGU sang si Lopez pa ang alkalde sa San Dionisio. Si Sumbong ang timbang ni Diergos nga nagsugod lang trabaho sa iya sang Oktubre 24, 2021.