Former Councilor Plaridel Nava, nagpaathag sa natabo nga komosyon sa tunga nila sang bodyguards ni Mayor Jerry Treñas sa Jubilee Hall

ILOILO CITY – Nagpa-athag si former Councilor Plaridel Nava sa natabu sa Jubilee Hall kagab-i samtang nagahulat siya kag iban pa nga mga nagdaug sa May 9 elections nga iproklamar.

Nag-react si Nava matapos nag-post si Iloilo City Mayor Jerry Treñas sa iya Facebook page nga gintiklod ang isa sa mga bodyguards niya.

Suno kay Nava, una siya nag-abot sa Jubilee Hall. Matawhay man suno sa iya ang sitwasyon kag nagpangumusta kag nag-istorya pa siya sa iban nga mga nagdaug sa pagka-councilor antes nagpungko sa likod. “Ang malain, pagsulod nila nga mag-asawa, si Treñas nag-agi sa tunga. Ang iya asawa naglabay pa sa kilid ko. Gapanggarit-garit sila. Tapos ang apat niya ka bodyguard, gatindog di ‘ya sa kilid ko. Ti kun sa iya [Mayor Jerry Treñas] ko man na bi obrahon, nga ang bodyguard ko patindugon ko sa kilid niya? Ano batyagon niya? Dapat tani wala sila ga-provoke if they want peaceful atmosphere. Waay man ko security sa sulod. Upod ko pamilya ko,” ang pahayag ni Nava.

Suno kay Nava, ginbalikid niya ang mga bodyguard sang alkalde kag ginhambalan nga indi magtupad sa iya. “Siling ko, ‘pwede kamo di kahalin? Didto lang kamo bantay sa iya, indi kamo di magtupad sa akon. Wala sila gasalabat. Tumindog na ‘ko kag ginhambalan sila nga kun indi kamo di karon maghalin maginamo ta di.’”

Ginpahayag ni Nava nga indi siya magpasugot nga i-provoke sa atubang sang iya pamilya.