Bangkay sang lapsag nga naputos sa plastic, nasapwan sa kanal sa Rizal, La Paz; Iloy sang lapsag, nakilala

ILOILO CITY — Nakilala na ang iloy nga nagbilin sang lapsag nga naputos sa plastic kag nasapwan sa kanal sa Rizal, La Paz kahapon sang aga, Mayo 24.

Ini ang ginkumpirmar ni Barangay Kagawad Rolando Gellado matapos ang pagpangusisa kun sin-o ang nagbilin sang lapsag sa lugar.

Nagpamalibad ang kagawad nga pangalanan ang babaye.

Naga-board ang babaye sa balay sa diin nasapwan ang lapsag kag suno kay Gellado sa boarding house man ginbun-ag ang lapsag.

Nagtuad ang landlady sang babaye nga nagpa-check up ini sa ospital gani nga ginsundan sang kapulisan.

Suno kay Gellado, naabtan ang 24-anyos nga babaye sa West Visayas State University Medical Center upod ang iya 40-anyos nga live-in partner, pila ka oras matapos nasapwan ang lapsag.

Sang gin-usisa, nag-aku ang babaye suno sa kagawad nga patay na sang ginbun-ag ang lapsag pero nagpamalibad siya nga magsaysay kun ngaa ginbilin niya ang lapsag sa kanal. Nagahilibion lang ang babaye sang ginpamangkot sang kapulisan, dugang ni Gellado.

Admitted subong ang babaye sa ospital.

Ginpalubong naman sang mga barangay officials ang lapsag sa La Paz Cemetery matapos nga ginpamisahan.