Pa-AKSYON | Taxi operator, nagreklamo nga indi maka-claim sang insurance agud mapakay-o ang iya unit bangud expired ang registration sang pick up sang PSTMO nga nakabunggo sa iya

ILOILO CITY — Nagreklamo sa Aksyon Radyo Iloilo ang taxi operator nga indi siya maka-claim sang insurance agud mapakay-o ang guba sa iya unit bangud expired na ang registration sang pick up sang Public Safety and Transportation Management Office (PSTMO) nga nakabunggo sa iya.

Suno kay Mr. Cosme Badillo Jr., natabo ang aksidente sa tunga sang iya taxi kag sa pick up sang PSTMO sa Aduana, City Proper sang Abril 28.

Ginpahayag niya nga 2018 pa ang registration sang pick up kabangdanan nga indi ma-release ang insurance nga inugpakay-o sa iya unit.

Base sa pagpa-estimate ni Badillo, kapin sa P18,000 ang damage sang iya salakyan bangud nagupi ang likod sini sang nabungguan sang pick up.

Duha ka beses naman siya nga nagkadto sa PSTMO pero wala gihapon ma-aksyunan ang iya reklamo.

Ginatinguhaan pa sang Aksyon Radyo nga mapangayuan sang pahayag si PSTMO Head Jeck Conlu. — via AM Reports