Aksidente sa Pandac, Pavia nga nagresulta sa kamatayon sang magnobyo, nakuhaan sang CCTV footage
ILOILO – Patay ang magnobyo sang nabungguan sang SUV ang motorsiklo sa Brgy. Pandac, Pavia sang Mayo 29 sang gab-i.
Ginkilala ang mga biktima kanday Gerald Jade Fuentebella, 29, sang Barangay Tacas, Jaro, kag Leslie Grace Aldamar, 31, sang Zone 8, Brgy. Cagbang, Oton.
Base sa kuha sang CCTV camera, naglapaw sa pihak nga lane ang SUV gani nabungguan ang kasugata nga motorsiklo.
Suno kay Police Lt. Soviet Torre, deputy Chief of Police sang Pavia Police Station, ginamaneho ni Marffy Reign Lagamo, 19-anyos sang Brgy. Pandac, Pavia ang SUV.
Gindala pa sa ospital ang magnobyo pero pareho nga gindeklarar nga dead-on-arrival.
Ginatunguhaan sang Aksyon Radyo nga makig-angut sa driver sang SUV.