Driver sang SUV nga nakabunggo sa motorsiklo nga ginsakyan sang magnobya sa Pavia, paga-isyuhan sang show cause order — LTO 6

ILOILO CITY — Maga-issue sang show cause order si Land Transportation Office (LTO) 6 Director, Eric Lenard Tabaldo batok kay Marffy Reign Lagamo, ang 19-anyos nga babaye nga nagamaneho sang SUV kag nakabunggo sa motorsiklo nga ginasakyan sang magnobya nga nagresulta sa ila kamatayon sa Pavia, Iloilo sang Mayo 29.

Suno kay Atty. Allan Sacramento, Chief Operations Officer sang LTO 6, ginahulat na lang sang opisina sang Regional Director ang resulta sang imbestigasyon sang Pavia Police.

Dugang pa niya, nakalab-ot na sa ila opisina ang CCTV footage sa diin nagapakita sang matuod nga natabo sa insidente.

Mahimo naman nga kanselahon ni Tabaldo ang driver’s license ni Lagamo pananglitan maguwa sa ila imbestigasyon nga may yara siya sang violations, suno pa kay Sacramento.

Nagpanugyan ang opisyal sa mga motorista nga mangin responsable sa pagmaneho sang ila salakyan.

Dapat suno sa iya nga nagakaangay ang kadasigon sang salakyan sa tagsa ka mga dalan.

I-sekyar man ang maintenance sang salakyan antes kag matapos gamiton agud malikawan ang aksidente. — with reports from Cedrick Anona