Isa sa tatlo ka suspects sa pagransak sa Jetti Gasoline Station sa Tabuc Suba, Jaro, nadakpan; P60,000 kag suspected shabu, na-recover
ILOILO CITY – Arestado ang isa sa tatlo ka suspek sa pagransak sa opisina sang Jetti Gas Station sa Tabuc Suba, Jaro sang Hunyo 7 sang kaagahon.
Ginkilala ang nadakpan kay Bryant Naya, 24-anyos sang West Habog-Habog, Molo.
Na-recover sa iya ang P60,000, lima (5) ka sachets sang suspected shabu kag ang shorts nga suksok sang isa sa mga suspek sang ginsulod ang gasolinahan.
Suno kay PCPT Eduardo Siacon, hepe sang Jaro Police Station, may informant sila nga naga-istar sa West Habog-Habog, Molo ang suspek rason nga ila ginkadtuan las-12 kaina sang kaagahon kag gin-aresto.
Ginpahayag ni Siacon nga base sa panaysayon ni Naya, siya ang nagsulod sa opisina paagi sa kisame.
Ang isa ka suspek amo ang look out, samtang ang isa ang nagbungkal sang pwertahan.
Dugang ni PCPT Siacon, ginsugid ni Naya nga P300,000 ang iya share sa ila pagransak sa gasolinahan.
Nagbalibad si PCPT Siacon nga hingadlan ang duha pa ka suspek nga at-large bangud padayon ang hot pursuit operation batok sa ila.
