Suspek sa pagpatay sa branch manager sang pawnshop sa Kalibo, Aklan, arestado paagi sa hot pursuit sang kapulisan
Na-aresto paagi sa hot pursuit operation sang kapulisan ang suspek sa pagpatay sa 23-anyos nga babaye nga si Bonna Hercia Ambay nga branch manager sang RD Pawnshop Kalibo, kahapon sang udto, Hunyo 9.
Base sa press release sang Kalibo Municipal Police Station, nadakpan sa Pasig City ang suspect nga si Mark Archie Torrefiel, 31-anyos, matapos nagpalagyo.
Si Torrefiel ang guwardiya sang pawnshop nga gina-obrahan sang biktima kag tumandok sang Brgy. Cajilo, Makato, Aklan.
Ginhimo ang operasyon sang gintingub nga pwersa sang Kalibo Police; Intelligence Operatives, Criminal Investigation and Detection Group; National Intelligence Coordinating Agency; kag CIDG Aklan.
Hunyo 6 sang aga sang nasapwan si Ambay sa sulod sang pawnshop nga may madamo sang pilas sang pagkabuno.
Sa initial nga imbestigasyon sang Kalibo police, pagpangawat ang motibo sa krimen bangud kinahanglan sang suspek ang kwarta para igawad sa iya motorsiklo nga nakaprenda.
Natukiban man nga may record sang pagpangawat si Torrefiel sa Pasig City kag Kalibo, Aklan suno kay Belcina.
Yara na police custody sang Camp Crame ang suspetsado.
