Bangkay sang German, ang ginpatay sa San Enrique, Iloilo, gin-autopsy na

ILOILO – Gin-autopsy na ang bangkay ni Otto Wolfgang Alexander Knorr, ang German national nga gintiro patay sa Brgy. Camiri, San Enrique sang Hunyo 8 sang gab-i.

Suno kay PLT Kate Apaitan, designated spokesperson sang Special Investigation Task Group (SITG), ginahulat na lang nila ang resulta sang autopsy agud makahimo sang dugang nga imbestigasyon.

Dugang pa ni Apaitan, may na-recover sa crime scene nga sweat shirt nga may nakit-an nga hair strings kag ginapatihan iya sang suspect.Ginpadala na ang recoveries sa crime laboratory sang PRO 6.

Na-designate naman ni Iloilo Police Provincial Office Director PCOL Adrian Acollador sa mga miyembro sang Special Investigation Task Group (SITG) ang pagsolbar sang kaso.

Ginakabig ni Acollador nga special case ang natabo kay Knorr ilabe na gid nga foreigner ang biktima nga naga-estar sa probinsiya.

Ginkumpirmar ni Acollador nga may mga persons of interests na sila, apang subject tanan sa verification. – via Fraye Cedrick Anona