Iloilo City Mayor Jerry Treñas, ginpangunahan ang launching sang LPTRP
Ginpangunahan ni Iloilo City Mayor Jerry Treñas ang launching sang local public transport route plan (LPTRP) bilang kabahin sang ika-124th nga Independence Day celebration sang siyudad kahapon, Hunyo 12.
Gintambungan ini ni Public Safety and Transportation Management Office (PSTMO) Head Jeck Conlu, mga taga-Land Transportation Franchising and Regulatory Board (LTFRB 6), Land Transportation Office (LTO 6) kag mga presidente sang transport cooperatives sa siyudad.
May ginhiwat man nga signing sang Pledge of Commitment sa nasambit nga programa.
Sa pagsugod sang implementasyon sang LPTRP kahapon, nag-epekto man ang pito (7) ka bag-o kag 17 ka rationalized routes agud mag-cater sa mga pasahero halin sa mga terminal pakadto sa mga distrito sa siyudad.
Ginapaabot naman ang pagpugok sang mga pasahero subong nga adlaw bangud tubtob na lang sa mga perimeter boundary terminals ang mga provincial jeepneys.
Una na ginpasalig ni Conlu nga may bastante nga PUJs nga handa mag-augment kag na-identify na nila upod sa transport cooperatives ang initial nga kinahanglan nga PUJs para mag-cater sang mga pasahero ilabe na kun Lunes.
