Una nga adlaw sang Local Public Transport Route Plan sang Iloilo City Government, wala sang problema suno kay PSTMO Head Jeck Conlu

ILOILO CITY – Wala sang nakita nga problema si Public Safety and Transportation Management Office (PSTMO) head Jeck Conlu sa una nga adlaw sang implementasyon sang Local Public Transport Route Plan (LPTRP) sa Iloilo City kahapon, Hunyo 12.

Suno kay Conlu, gin-implementar sang siyudad ang LPTRP para makita ang actual nga problema kag gilayon nga mapangitaan sang solusyon.

Ang pahayag ni Conlu baliskad sa mga reklamo nga nabaton sang Aksyon Radyo Iloilo nga madamo ang nagsala-sala nga mga pasahero kahapon bangud sa mga bag-o nga ruta sa siyudad.

Gin-athag man ni Conlu nga indi pwede ang mga tricycle nga makahakot sang mga pasahero halin sa mga perimeter boundary terminals pasulod sa siyudad.

Suno kay Conlu, pwede mamultahan kag ma-impound ang colurum nga mga tricycle. – via Aksyon Reports Morning Edition