Iloilo City government, gab-i na naka-request sang augmentation sang mga PUJs sa mga perimeter boundary terminals kahapon, Hunyo 13 suno sa legal officer sang LTFRB 6
ILOILO CITY – Gin-ako ni Land Transportation Franchising and Regulatory Board (LTFRB) 6 legal officer Atty. Salvador ‘Jun’ Altura Jr. nga kulang ang mga depasahero nga jeep nga naga-cater sang mga pasahero halin sa mga perimeter boundary terminals sang siyudad sang Iloilo.
Suno kay Altura, base sa Local Public Transport Route Plan sang City Government nga gin-aprubahan sang Department of Transportation, nagalab-ut sa 1,767 ang authorized units nga makabiyahe sa siyudad. “Ang ini nga numero, ginakonsiderar ni nga amo na modernized jeepneys nga mabiyahe. Pero as of now, ang gabiyahe nga modernized jeepneys is only 91.”
Bangud kulang ang modernized jeepneys, ginpasugtan anay ang mga traditional jeepneys nga mag-augment. Apang bangud dyutay ang seating capacity sang traditional jeepneys, limitado man ang numero sang mga pasahero nga mahakot sa mga terminals.
Kahapon suno kay Altura, 923 units lang ang nakabiyahe gani nga nag-request sang augmentation ang City Government. Pero ang request, ginhimo ni PSTMO Head Jeck Conlu pagkatapos na sang evaluation meeting “late in the evening.” Kinahanglan man ang approval ni LTFRB 6 Director Richard Osmeña sa paghatag sang special permit bangud mga PUJs nga may provincial routes ang i-augment.
Sa subong suno kay Atty. Altura, “nahimo siya nga 1,197 units [ang gabiyahe].”
