Mga drivers sang Leganes Hi-way nga jeep, nagapanawagan sang pag-intiende sa Iloilo City government sa pag-implementar sang LPTRP
ILOILO CITY — Nagapanawagan ang mga drivers sang Leganes nga jeep sa Iloilo City Government nga tani ma-intindihan man ang ila sitwasyon sa pag-implementar sang Local Public Transport Route Plan (LPTRP).
Suno kay Jun Toledo, driver kag operator sang Leganes-Highway nga jeep, pigado gid ang ila income subong nga adlaw bangud tubtob na lang sa Tagbak terminal ang ila nga unit.
Kun sang una nga puwede pa makasulod sa syudad ang ila nga unit, nagaginutok na ang pasahero sa rush hour. Pero subong, madugay na ang pun-anay sang pasahero suno kay Toledo.
Nagalab-ut sa P2,000 tubtob P2,500 ang ma-income niya sang una pero subong, ensakto na lang sa pang-gasolina ang ila ma-income.
Panawagan ni Toledo,“Kuntani, sa City government, tani ma-intindihan niyo gid tani ang sitwasyon sang Leganes Hi-way nga drivers. Damo gid naga-problema tungod wala na sila i-take home. Wala na sila ibakal sud-an. Basi ang diaper kuno, dulaon na kay i-prioritize na lang ang sud-an kag kan-on.”
Ginpabutyag niya nga nagapila na lang sila kag nagahulat sang pasahero nga pagguwa sa syudad sang sa mawad-an sila sang income.
Ginpahayag man niya nga madamo sang mga drivers ang nag-untat na sa pamasada bangud indi nila masarangan ang arkila sa mga jeep.
